Ресторани звезди се раѓаат во Македонија. Некои од нив посетивме на задоволство на нашите сетила, и несебично ќе ја поделиме тридневната гастрономска авантура со Вас. Почнавме со рибја чорба во новата национална гостилница Дукат послужена во традиционално котле кое потсетува на сцените од Македонски народни приказни, вистинска македонска уметност на подготовка, убава структура на фондот, не премногу густа, со парчиња црвена пастрмка внимателни исчистени. Продолживме со галичко мезе,комбинација од овчо полномасно сирење со свилена структура и зреен остар, мудар галички кашкавал во комбинација со пита и макало. Старата и сто пати потврдена рецептура на свинска коленица не занеме. Мека текстура на месото омекната на трпелив начин со долго варење на тивок оган па печена,прелиена со фин редуциран кафеав сос од коски. Во Дукат придржувани од соодветно избрана музика, завршивме со карамелизирана дуња која ја симболизираше душата на македонската вредна жена изладена со топка висококвалитетен сладолед од ванила.